Landvinnsla

Afli til vinnslu á árinu 2017 var 23.488 tonn, en árið á undan var afli til vinnslu 28.375 tonn.

Í maí var tekin ákvörðun um að sameina botnfiskvinnslur félagsins á Akranesi og í Reykjavík. Í framhaldinu var vinnslu hætt á Akranesi í lok ágúst. Samhliða þeirri ákvörðun var dregið verulega úr kaupum á hráefni til vinnslu frá innlendum fiskmörkuðum.

Útgerð

HB Grandi hf. gerði út tvö uppsjávarskip á árinu og var útgerðarmynstur þeirra svipað og árið 2016. Loðnuaflinn var 9.934 tonnum meiri árið 2017 en 2016 eða 26.635 tonn samanborið við 16.701 tonn árið áður.

Makrílveiðar hófust í júlí líkt og fyrri ár og lauk þeim í september. Allur aflinn var veiddur af uppsjávarskipum félagsins og honum landað á Vopnafirði. Veiðar úr norsk-íslenska síldarstofninum hófust í október og lauk innan sama mánaðar.

Veiðar á íslenskri síld fóru fram yfir sumartímann með makrílveiðum. Ekki var tilefni til að fara í beinar síldveiðar þar sem aflaheimildir í íslenskri síld hafa dregist verulega saman.

Kolmunnaveiðar gengu vel og fóru að mestu fram í apríl og maí en skipin náðu einnig ágætis afla í færeysku lögsögunni í lok árs.

Landvinnsla

Landvinnsla félagsins gekk vel árið 2017. Lítið var fryst af heilli loðnu vegna verkfalls sjómanna sem stóð til 18. febrúar. Framleiðsla loðnuhrogna gekk þó vel og jókst verulega frá fyrra ári. Vinnsla á makríl og síldarafurðum var svipuð á milli ára.

Markaðsmál

Markaðssvið HB Granda hf. ber ábyrgð á sölu- og markaðsmálum félagsins. Sviðið ber jafnframt ábyrgð á gerð útflutningsskjala og skipulagningu á flutningi og afhendingu vara á markaði. Markmið starfsfólks markaðssviðs er að hámarka verðmæti úr aflaheimildum félagsins. Það er gert með markvissri birgðastýringu, náinni samvinnu við kaupendur á mörkuðum og við framleiðslueiningar félagsins.

Allir starfsmenn í sölu- og markaðsmálum eru staðsettir í Reykjavík og starfa þeir náið með framleiðsludeildum félagsins. Að baki starfsemi markaðssviðs lágu 14 ársverk árið 2017.

Sölunálgun

Áhersla er lögð á að selja vörur milliliðalaust til viðskiptavina á erlendri grundu. Víðtæk þekking á allri virðiskeðjunni, allt frá veiðum til neytenda, er mikilvæg, svo hægt sé að samræma fjölbreytt vöruframboð við kröfur kaupenda og neytenda. Sölustjórar og aðrir starfsmenn sviðsins fara í reglulegar heimsóknir til viðskiptavina og taka þátt í ýmsum viðburðum á mikilvægum mörkuðum. Jafnframt eru heimsóknir viðskiptavina á starfsstöðvar félagsins tíðar.

Viðskiptavinir eru flestir dreifiaðilar eða framleiðslufyrirtæki og eru neytendavörur bæði seldar á veitingamarkaði og í smásölu undir vörumerkjum kaupenda eða smásala. Uppbygging langtíma viðskiptasambanda er mikilvægur hluti af markaðsnálgun félagsins og við val viðskiptavina er lögð áhersla á náið samstarf og aðgang að markaði sem hentar framleiðsluvörum HB Granda hf.

Markaðssamskipti

HB Grandi hf. heldur úti vefsíðu með reglulegum fréttaflutningi á íslensku og ensku, sem einnig er miðlað í gegnum samfélagsmiðla á vegum félagsins. Félagið gefur út ýmsa kynningarbæklinga, þar sem framleiðsluafurðir þess eru kynntar, og gefur út fréttabréfið Þúfu, þar sem ýmsum fréttum úr starfsemi félagsins er komið á framfæri bæði á íslensku og ensku. Árlega er HB Grandi hf. með veglegan sýningarbás á alþjóðlegu sjávarútvegssýningunni í Brussel, sem er sú stærsta sinnar tegundar í heiminum. Jafnframt er félagið þátttakandi í öðrum mikilvægum sýningum, s.s. alþjóðlegu sjávarútvegssýningunum í Boston og Qingdao.

Vörumerki

HB Grandi hf. framleiðir og markaðssetur nánast allar sínar vörur í eigin umbúðum, undir eigin vörumerki. Markaðssvið hefur einnig aðkomu að sölu afurða dótturfélagsins Vignis G. Jónssonar ehf. og eru þær í flestum tilfellum seldar undir vörumerki þess félags. Auk þess selur dótturfélagið Norðanfiskur ehf. sínar vörur á íslenskum markaði undir eigin vörumerki og vörumerkinu Fiskur í matinn. Dótturfélagið Blámar ehf., sem keypt var á árinu 2017, selur einnig afurðir undir eigin vörumerki. Bæði HB Grandi hf. og Vignir G. Jónsson ehf. framleiða jafnframt talsvert af afurðum sem bera vörumerki viðskiptavina.

Þjónusta

Áhersla er lögð á að einfalt sé að eiga viðskipti við HB Granda hf. og að viðskiptavinir upplifi alltaf góða þjónustu. Reglulega eru þarfir viðskiptavina metnar ásamt upplifun þeirra af bæði vörum og þjónustu HB Granda hf. Niðurstöður eru nýttar til að bæta þjónustuna til að unnt sé að sinna viðskiptavinum sem best og eru hvatning fyrir starfsfólk að viðhalda háu þjónustustigi við viðskiptavini.

Ábyrg nýting fiskstofna

HB Grandi hf. tekur virkan þátt í samstarfi sem stuðlar að sjálfbærri nýtingu fiskstofna og ábyrgð gagnvart umhverfi og samfélagi. Markmiðið með þátttöku HB Granda hf. er að stuðla að samvinnu um faglega nýtingu fiskstofna innan íslenskrar lögsögu og tryggja markaðsaðgengi.

Áhersla er lögð á samstarf við Ábyrgar fiskveiðar ses., sem stendur fyrir upprunamerki fyrir íslenskar sjávarafurðir og vottun á ábyrgum fiskveiðum Íslendinga, undir merkjum Iceland Responsible Fisheries. Markaðssetning á merkinu er í höndum Íslandsstofu og á HB Grandi hf. fulltrúa í stjórn Ábyrgra fiskveiða ses. og í fagráði sjávarútvegs hjá Íslandsstofu. HB Grandi hf. er jafnframt hluthafi í Icelandic Sustainable Fisheries ehf., sem hefur þann tilgang að afla vottana gagnvart staðli Marine Stewardship Council (MSC). Þátttaka í félaginu veitir aðgang að MSC vottunum fiskstofna við Ísland. Að auki eru fiskmjöls- og lýsisverksmiðjur HB Granda hf. IFFO RS vottaðar, sem vottar sjálfbæran uppruna fiskmjöls- og lýsisafurða. HB Grandi hf. er enn fremur bakhjarl samtakanna Global Sustainable Seafood Initiative (GSSI). Markmiðið með starfsemi GSSI er að auka gagnsæi í vottunum um sjálfbærni í sjávarútvegi og fiskeldi.

Vottuð gæðakerfi

Félagið er með vottuð gæðakerfi skv. staðli IFS Food (International Featured Standards), FEMAS (Feed Material Assurance Scheme) og HACCP (Hazard Analysis and Critical Control Points). Markmið með vottun gæðakerfa er að staðla verkferla og fá staðfestingu óháðra aðila á að þeim sé fylgt. Gæðakerfi eru einnig leið til stöðugra umbóta og tryggir vottun þeirra markaðsaðgengi á tiltekna markaði og markaðshluta. Ávinningur af vottuðum gæðakerfum er því bæði markaðslegur og rekstrarlegur.

Öryggismál

HB Grandi hf. leggur áherslu á öryggi starfsfólks og að allir starfsmenn félagsins beri ábyrgð þegar kemur að öryggi og vinnuvernd. Hjá félaginu eru um 70 starfandi öryggisfulltrúar til sjós og lands, auk þess sem stjórnendur vinna markvisst að málaflokknum í takt við stefnu félagsins.

Alvarlegum slysum fækkaði milli áranna 2016 og 2017 auk þess sem skráning slysa og atvika er nú betri en áður. Helstu áhættuþættir í starfsemi félagsins hafa verið greindir og er unnið markvisst að því að draga úr áhættu.

Félagið gefur út öryggisskýrslu ár hvert þar sem öryggis- og vinnuverndarstarfi líðandi árs eru gerð skil, auk þess sem greint er frá slysum í forvarnarskyni. Öryggisskýrslur eru aðgengilegar á innra neti félagsins.

Starfskjarastefna

Aðalfundur 2017 samþykkti, að tillögu stjórnar, starfskjarastefnu fyrir félagið. Markmið starfskjarastefnunnar er að gera starf hjá félaginu að eftirsóknarverðum kosti fyrir fyrsta flokks starfsfólk og þar með að tryggja félaginu stöðu í fremstu röð á alþjóðavettvangi.

Dótturfélög

Vignir G. Jónsson ehf.

Vignir G. Jónsson ehf. sérhæfir sig í fullvinnslu á hrognum og er stærsti einstaki kaupandi grásleppu- og þorskhrogna á landinu.

Rekstrartekjur á árinu voru 15,6 m€. Hagnaður af rekstrinum nam 0,3 m€. Heildareignir í árslok námu 11,1 m€ en eigið fé var 6,6 m€ eða 60%.

HB Grandi hf. á 100% eignarhlut í Vigni G. Jónssyni ehf. og nam bókfært verð eignarhlutarins 12,5 m€ í árslok 2017. Áhrif félagsins á rekstur samstæðunnar voru jákvæð um 0,03 m€.

Norðanfiskur ehf.

Norðanfiskur ehf. framleiðir fiskafurðir fyrir neytenda- og stóreldhúsamarkað innanlands og utan.

Rekstrartekjur á árinu voru 11,3 m€. Tap af rekstrinum nam 0,2 m€. Heildareignir í árslok námu 4,5 m€ en eigið fé var 3,0 m€ eða 71%.

HB Grandi hf. á 100% eignarhlut í Norðanfiski ehf. og nam bókfært verð eignarhlutarins 6,1 m€ í árslok 2017. Áhrif félagsins á rekstur samstæðunnar voru neikvæð um 0,3 m€.

Blámar ehf.

Blámar ehf. framleiðir fiskafurðir fyrir neytendamarkað innanlands og utan. HB Grandi hf. keypti 100% eignarhlut í félaginu í lok október og verður það hluti af samstæðu HB Granda hf. frá og með 1. janúar 2018, þegar seljandi hefur uppfyllt skilyrði, sem ákvarða endanlegt kaupverð.

Hlutdeildarfélög

Deris S.A.

HB Grandi hf. á 20% hlut í eignarhaldsfélaginu Deris S.A. í Síle. Deris á sjávarútvegsfélögin Friosur og Pesca Chile. Félögin gera út tvo frystitogara, tvö línuskip sem frysta aflann, þrjá ísfisktogara, eitt skip til ljósátuveiða og rekur eitt fiskiðjuver. Að auki á Deris fiskeldisfyrirtækið Salmones Friosur S.A. sem rekur fiskeldisstöðvar í Síle.

Hagnaður af rekstri Deris árið 2017 var 25,2 m€. Áhrif félagsins á rekstur HB Granda hf. voru jákvæð um 5,0 m€. Bókfært verð eignar HB Granda hf. var 24,4 m€ í árslok 2017.